《ꉠꊿꋅꅇꂷ》
ꁱꊿ：ꏾꐚꈬꁇ
ꀘꊿ：ꒉꎄ
ꊿꋅꆹꉠꊿꋅ
ꅇꂷꆹꉠꅇꂷ
ꉡꆀꃅꏸꉷꃅꃯꇬꑌ
ꉠꊿꋅꅇꂷꆹꉡꌌꄎꌬꀕꃅꄜꇬꎷ
ꃰꊿꂷꊨꏦꊿꋅꅇꂷꌌꄜꁮꀕꃅꌬꄡꑟ
ꉡꌋꆀꉠꅇꂷꆹꋍꇅꂯꐮꐞꀋꋻ
ꐭꇁꃅꋍꑍꇯꆐ
ꀊꂵꐊꄉꊿꐈꀊꂵꁮꅉꅲ
ꀉꂿꐊꄉꀉꂿꅩꌺꐥꐨꅲ
ꀉꄉꐊꄉꍜꇰꀊꇐꈄꄮꅲ
ꋋꈨꉬꇮꁧꐙꉠꇱꄓ
ꊿꋅꁯꆐꒌꆠꐊ
ꊿꋅꁯꆐꅇꂷꐥ
ꍏꉸꊿꋅꉬꊰꃘꁯꌠꇬ
ꉠꆈꌠꅇꂷꁱꂷꆹꐩꋊꎵꑳꀕ
ꊿꋅꐥꑲꆀꅇꂷꐥ
ꅇꂷꐥꑲꆀꁱꂷꐥ
ꉪꊇꆹꈍꄮꇊꈍꄮꑌ
ꊿꋅꅇꂷꌌꋧꃅꄉꀊꅰꃅꀻꎆꎂꀕ
ꈍꄮꅑꅸꇁꀋꐛ ꋍꈨꋋꈨ
ꉠꆈꌠꌺꇖꅇꂷꁱꂷꌶꀋꅲ
ꊨꏦꊿꋅꅇꂷꌶꑲꆏꑊꏦꌠꌡ
ꄚ，ꆎꆈꌠꌺꆹꉬꑲꆏ
ꀒꁨꋍꁘꃅꊿꋅꅇꂷꌌꀻꎆꄡꑟ
ꆎꆈꌠꅪꆹꉬꑴꆏ
ꀒꁨꋍꁘꃅꊿꋅꅇꂷꌌꏁꇅꁤꇅꁏꄡꑟ
ꀃꑍꋋꄮ
ꃅꋊꆹꀋꆏꃅꐛꐈ
ꐥꐨꑌꀋꆏꃅꌄꆣ
ꉪꊇꆹꈍꄮꑌ
ꆀꐊꆀꉙꃅ ，ꆀꉙꍅ꒚ꀕ
ꉷꐊꉷꉙꃅ ，ꉷꉙꇔꍣꀕ
ꊿꋅꁯꋧꃅꇬꄉꀻꎆꂯꇬꆹ
ꈀꄸꑌ
ꋍꃀꁨꀋꑌ，ꉌꂵꄅꀋꑌ
ꉌꆹꉪꐨꐊ ，ꑭꆹꄔꐨꐊ
ꇇꆹꃅꐨꐊ ，ꑓꆹꆫꐨꐊ
ꀒꁨꋍꁘꃅꊿꋅꅇꂷꌌꁨꐝꄒ
ꏁꇅꀕꌠꂷꇭꋍꁘꄔꌌꈜꍪꎂꀕ
ꉠꅇꂷꆹꈍꄮꑌꉡꄜꀋꑍꀋ꒖
ꎹꄓꀀꐙꇁꄮꑓꁴꀒꈑꑌꇉꋺ
ꊿꋅꅇꂷꆹꉪꊇꐰꇑ
ꊿꋅꅇꂷꆹꉪꊇꎭꈓ
ꊿꋅꅇꂷꆹꉪꊇꉂꏣ
ꊿꋅꅇꂷꆹꉪꊇꒌꆠ
ꊿꋅꅇꂷꆹꉪꊇꊋꃤ
ꊿꋅꅇꂷꆹꉪꊇꍸꇐ
ꊿꋅꅇꂷꆹꉪꊇꌬꇐ
ꊿꋅꅇꂷꆹꉪꊇꊫꂫ
