微信截图_20240820160225

 ꋧꃅꉂꊿ—ꀉꂿ

ꁱ｜ꐙꁮꌅꊞ

 ꀘ｜ꐙꇐꑸꆀ

ꌞꃅꁧꎔꇉꄙꐛ，ꀉꂿꁧꎔꇉꄙꏭꀋꋌ。ꌞꃅꒉꎔꃪꎔꐛ，ꀉꂿꒉꎔꃪꎔꏭꀋꋌ。ꆈꌠꇐꀳꇬ：“ꌞꂿꈁꎔꎗ，ꀂꂿꉂꀋꋌ”ꄷ。

ꉢꁦꀑꁧꄩꌩꏓꒉꇸꆸꄮꇬ，ꎺꇁꀉꂿꄀ。ꃮꋚꃬꋚꎹꄮꇫ，ꎺꇁꀉꂿꄀ。ꋚꃅꋚꑽꐹꄮꇬ，ꎺꇁꀉꂿꄀ，ꄯꒉꁱꂷꌶꄮꇬ，ꎺꇁꀉꂿꄀ。ꉘꁮꈞꆈꃹꒉꃲ，ꆧꏮꁧꎏꅐꇁꇰꄮꇬ，ꎺꇁꀉꂿꄀꇁꀐ。

ꉠꀉꂿꑠꂷꑌ，ꀉꂿꀊꏀꄮꇬꆹꇭꀧꀉꒉꑠꂷꉬ，ꀋꃉꉢꀉꒉꈭꐨꆏꀉꂿꆹꇭꀧꀄꊭꂷꐛꀐ。

ꀉꂿꑘꃅꊖꑣꄮꇬ，ꀉꑳꄌꂣꈐꊐꌊꌩꁵꒉꇸꐺ，ꀃꑍꋋꄮꀉꂿꈁꑓꑊꈜꋍꄅꇈꋍꄅꐛꀐ。ꀉꂿꋙꊪꒉꏽꄮꇬ，ꀉꂿꑓꋪꏁꇉꀕꃅꀋꐚꃲ，ꋚꃃꒉꃃꄉꀉꂿꑓꋪꈑꋍꎙꇈꃲ；ꀉꂿꂱꀯꃹꌙꀕ，ꋚꄸꒉꄸꋠ，ꈾꃙꑸꑽꋠꌠꒉꄸꉬ。

ꋚꎔꒉꎔꋠꀋꀬꌠꀉꂿ，ꃢꎔꈚꎔꈚꀋꀬꌠꀉꂿ。

ꀉꂿꆹꀋꃅꉬꊯꌕꈎꀐ，ꋋꆹꉈꏭꉌꈲꃅꈋꌧꇐꂿꇐꑠꀋꌧ，ꃏꏸꉺꍯꑌꀋꋻ，ꑠꃅꄉ，ꀁꇬꈍꃅꌢꎭꇬꑌꀉꂿꄡꇗꀋꎪꀋꑴꃅꉪꊇꀉꑳꉬꑻꌠꋌꏃꌊꄯꒉꀘꄉꌐ。ꋌꅉꀕꃅꇈꈬꄉꑘꁨꊖꑣꌊꉪꊇꄯꒉꀘꇬꎷ。

ꎺꇊꐝꄧꀕ，ꉪꊇꄯꒉꀘꎆꃀꀋꊌꄉ，ꀉꂿꆹꏣꃀꏣꑟꃷꇎꃷꇤꄷꎆꉛꋙꉾꅗ。ꃷꇎꃷꇤꏣꃀꏣꑟꈧꌠꀉꂿꏭꄉ，ꌞꌺꌧꇐꂿꇐꈍꃅꀉꇨꄷꌠꉉꇬꎷ，ꋋꑷꄰꀉꑳꇪꊞꀐꄸ、ꀉꑷꄰꀉꑳꄊꑪꀘꀐꄷ.... ..

ꀃ！ꅇꂷꋋꈨꀉꂿꅲꇎꅲꅗꑟ，ꀉꂿꑌꊨꏦꀱꊨꏦꏭ：“ꀋꏦꇊ，ꀋꏦ，ꌞꌺꀀꌺꈁꉬꐯꌟꀋꆆ”ꉂꃅꉪꄡꑟ，“ꀀꌺꑌꌞꌺꌟꃅꌳꉔꄞꅐꇁꅊꈫ”ꃅꉪꊇꌺꇖꊂꉌꄉꉘꇉꄡꑟ。

ꀃ！ꃰꊿꉌꃀꉪꅉꐛꉆꆏ，ꌒꌠꎭꌊꀉꂿꁵꑟꉂ，ꎔꌠꎭꌊꀉꂿꇢꂿꉂ，ꀉꂿꁳꄉꋍꍂꉌꌒꎻꑟꉂ。

ꀃ！ꀋꏦꀞ，ꀋꏦ！ꉪꊇꆹꈏꇤꊋꇤꄉꌧꇐꂿꇐꌷꄉ，ꊁꇁꋍꑍꆏꀉꂿꑆꊋꀱꂿ。

ꋧꃅꉂꊿ，ꉠꀉꂿꇆ——ꉢꆎꉂ！