ꑊꋌꈀꄸꉬ

 ꎭꂵꃴꐂ｜ꁱ ꐙꇐꑸꆀ｜ꀘ  

ꉌꇑꇉꇬꀀ、ꎸꀀꈊꀋꀀ，ꀋꄸꄷꃰꊿꐥꐨꋌꑵꉌꃀꉪꅉꐰꇑꇫꑟꑲꆏ，ꉡꆹꀿꃀꉂꏣꁳꑠꃅꅼꎻꑟꀋꉂ。

ꀉꂿꆹꋍꑍꋑꀋꋒꉿꄓꑷꀮꀋꂇꌦꂾꄓꄉꋍꍮꊪꀉꐡꍇꌠꋩꄉꃷꎏꇬꉜꄉꁧꇬꎷ，ꀈꈥꑠꃅꏛꃅꄓꑴꇬ，ꀉꂿꆹꌊꃷꎏꑟꄮꇬꆏꃷꎏꇬꆹꊿꀉꑌꃅꇫꐺꇈꇬꎷ，ꌩꋚꇓꂷ、ꎬꐚꂸꄤ、ꌫꀮꌬꀏ、ꋁꋂꋐꀕꀋꃷꅍꀋꐥ，ꍮꊪꍇꌠꆹꏸꑭꌊꑂꄻꅐꄉ，ꀉꂿꃷꎏꇬꑟꇬꆏꇵꂷꅧꇗꄹꄉ，ꌩꋚꇓꂷꈨꋌꇱꃼꍮꊪꍇꌠꊐꄉꇈ，ꑭꄔꀊꀋꊸꌦꇯꆐꉪꏤꑳꐮꏦꎫꈜꋍꏢꀉꄂꀊꋨꍈꇬꉜꄉꏹꀐ。

ꉢꎺꇬꌧꅪꋍꏣꆏꎆꃀꌕꂷꀠꏭꐛ，ꄚꑠꃅꑴꇬꋍꑍꄷꀋꄸꃷꇫꎭꌐꄎꌠꀋꉬ。ꌧꅪꋍꈨꋋꈨꆹꇫꃝꇬꄚꄉꆿꐛꀕꅹ，ꌞꊿꇫꃼꀋꅲ，ꌧꅪꋍꂷꉬꑲꆏꋍꏣꐛꄉꏽ，ꋍꂷꆿꐛꑲꆏꀉꒉꃅꐔꌠ，ꑠꐛꅹꋍꑍꌠꎆꃀꋍꑵꂷꊌꀋꄐ，ꋍꃢꋍꃢꆏꋍꑍꌠꎆꃀꑍꊏꌕꊰꂷꀉꄂꊌꑌꉆ。

ꃅꈎꋍꈓꈢꋒꁧꇬꑓꂭꊼꇅꀉꄂꋏꌠꌡ，ꀉꂿꆹꎆꃀꑍꊏꂷꀖꌊ“ꑍꊏꂷꃷꅉ”ꇬꆞꍈꅀꀂꄁꍈꇯꃼꈚꀋꀬ，ꀎꈓꋋꈬꈚ，ꊂꈎꋋꈬꈚ，ꈚꀕꌋꆀꑐꄓꇁꀐ。ꀉꂿꏦꎫꃼꇇꃅꒉꇬ，ꋍꑍꏦꎫꇬꋙꍈꃻꋠꀋꀬꌠ，ꈾꃚꍈꌋꆀꏢꈣꒉꑍꇯꀵꁧꇬꎷ，ꋋꆹꏎꏸꐯꏏꏸꀐꌠ，ꊿꋍꈨꋋꈨꉪꇬꉠꀉꂿꋋꂷꆹꀋꀬꂷꉬꃅꉪꋭ，ꄚꋀꊇꆹꉇꇷꀉꄂꂿꌠ。

ꀃꑍꋍꄮꆀꃅꁡꇤꇬ，ꅩꁌꃅꈯꉚꇫꎍ，ꉬꊰꃪꉬꄷꌦ，ꇖꊰꃪꉬꀐꄷꌦꃅ，ꀂꏾꂷꎑꂷꉬꑲꆏꈍꑋꊰꃪꉬꄷꇫꎍꇬꎷ。ꌞꉌꐡ，ꃶꐚꃅꌞꉌꐡ，ꐎꌊꄻꄉꌠꅀꏂꌊꄻꄉꌠꉬꀋꐚ，ꉢꉪꇬ，ꈀꄸꑌꃅꑆꋌꁬꇂꃴꐥꌠ、ꈀꄸꑌꃅꌗꋍꈨꏶꈻꌠ、ꈀꄸꑌꌦꅪꋋꈨꈴꌠꄸ，ꑞꐛꅹꃅꅩꁌꋍꒈꒊꇁꌠꉬ，ꈀꄸꑌꀉꄉꌺꀉꂿꅪ，ꈀꄸꑌꆈꌠꋋꃀꌺ，ꑞꐛꅹꃅꐮꐴꍠꇁꌠꉬ，ꃶꐚꃅꇬꊿꋌꉨꀽꇁꀋꉆ。

ꀉꂿꆹꎆꃀꋍꂷꇈꋍꂷ、ꋍꄙꇈꋍꄙ，ꃅꑍꃅꉖꈣꆏꎅꆹꑌ，ꀉꂿꆹꋍꍈꇈꋍꍈꃅꋌꎹꌊꃪꂶꌠꇬꑟ，ꑓꁴꈍꑋꌌꀠꌠꉬꀋꐚ、ꇵꂷꈍꑋꌌꆦꌠꉬꀋꐚ，ꀑꐎꈍꑌꏢꌌꀠꌠꉬꀋꐚ。

ꀿꃀꆹꌺꉘ，ꌺꏯꉂꏣꈜꀕꅼ，ꌺꉘꀉꒉꃲ，ꑲꋉꇣꄉꄮꉬꃲ，ꌺꄿꆏꑮꒃ，ꅩꄿꆏꌑꏹ，ꀿꎝꌺꁯꆹ，ꑮꒃꌺꁵꇈꄷꌠꉨ，ꀉꄉꀉꂿꆹꑮꒃꌺꁵꎭ，ꄚꑠꃅꑴꇬꎆꃀꈍꑋꊏꃪꂷꆹꇿꇬꎹꁧꂯ！ꑳꃻꇤꃻꂯꅀ、ꀑꇬꎆꀠꂯ，ꀉꄉꀉꂿꑋꆹ，ꑮꒃꌺꁵꀋꄐꄷꂓꄸꋋꇬꀵꀋꄚꌠ。

ꏮꅐꄮꉬꃲ，ꑮꒃꄮꉬꃲ，ꀉꄉꀉꂿꆹꑬꃶꈛꂿꍬꄉꎆꉛꐺ，ꋋꁯꄰꆸꑌ“ꊼꇅꏛꃅꀋꇁꃅ，ꃅꇢꄰꇱꉛꌊꀋꁧꌦꅇ”ꄷ，ꀊꋩꁯꄰꑌꄡꇗꑠꄷ，ꋋꇈꇬꉡꆹꇐꀳ“ꀀꇷꀂꀋꄙ，ꌞꇴꀁꄙꇁꀋꉆ，ꀀꎆꀂꀋꐥ，ꌞꎆꀀꃢꃅꀋꉆ”ꄷꋋꇬꐝꄧꀕꃅꉠꉌꂵꇬꃹ。

ꇳꇤꉎꇤꌐꀐ、ꃷꉆꌠꆏꃷꌐꀐ、ꋊꃤꎆꉛꉆꈧꌠꆏꉛꌐꀐ，ꀉꄉꀉꂿꑋꀑꇬꂶꌠꀉꄂꋒꌠꉬꏭꐛꀐ，ꎆ꒜ꑍꊏꃪꂷꐛ，ꑮꒃꋍꊭꈴꇎꃲ，ꀉꄉꀉꂿꑋꑌꃷꅍꀉꄂꋒꀐ。

ꑮꒃꑱꈐꊐ、ꏦꁁꇗꄃꀕꇬꑠꃅꊋꋠꑵꉬꑲꆏ，ꊿꐥꀞꑭꐈꐛꇫꐥꄈꂯꍑ，ꀉꄉꀉꂿꁳꊼꇅꐥꌒꃅꐥꄡꑟꌠ。

ꀋꄸꄷꌦꌺꌊꌺꑠꑵꐥꑲꆏ，ꉡꆹꇫꏯꀿꃀꉪꏭꉂꏣꑠꃅꄡꅼꇬꍑꀕꄷꉉꑟꉂ，ꋌꋍꑍꋙꍈꃻꋠꀋꀬꇬꑌ，ꌺꇐꂿꇬꆏ，ꀋꀬꅐꀋꐥ，ꀉꒉꃅꉉꇬꉪꁧꎁꃅꀑꇬꑌꃗꀬꌠ，ꉂꏣꅼꒉꅼꌠꄸ，ꀋꇷꋠꌠꆀꃅꁡꇤꅩꁌꇆ，ꆏꂾꀋꇷꋠ，ꀿꃀꌺꇐꏭꉂꏣꆏꇱꇽꇫꎭꄉꏽꀐꂼ，ꆎꆹꑊꋌꉎꃀꌡ，ꊾꋠꆿꃀꌡ，ꑊꋌꆹꆏꉬꅊꇈ，ꄷꀋꁧꑊꋌꀉꆈꂷ。

ꀋꄸꄷꉌꃀꉪꅉꐰꇑꇫꑟꑲꆏꉡꆹꀿꃀꉂꏣꁳꑠꃅꅼꎻꑟꀋꉂ，ꑞꃅꄷꆏꀉꄉꀉꂿꎭꏿꅼꇨꀐ，ꀑꐎꈍꑋꁦꎆꀋꐚ，ꇇꀙꈍꑋꍸꀋꐚ，ꀋꄸꄷꀉꄉꀉꂿꋋꈨꑠꃅꌺꇖꀋꉂꑲꆏꑠꃅꀋꎭꀐꌠ，ꌺꇖꎁꃅꆳꇁꉏꇨꄡ，ꃅꆳꂷꉐꑞꑌꀋꑴꃅꌺꇖꁧꎁꃅꎆꎹ，ꎆꃀꆹꑮꒃꄹꉇꆏꒈꀮꀆꐒꃝꃅꃝ，ꑠꃅꑴꇬꀉꄉꀉꂿꆹꊼꇅꉌꂵꈢꏭꃅꀋꐛ，ꑓꃅꊼꇅꋏꀋꇬꌠ。

ꃅꈯꉚꌠꆀꃅꁡꇤꅩꁌ，ꆎꆹꅉꁮꅽꏯꄉ，ꅉꏃꅽꏯꄉ，ꀿꃀꋍꍂꎆꎹꑌ，ꋍꑍꄷꆏꀕꇱꌌꄉꈢꋒꁧ，ꀉꇷ！ꆎꆹꊾꋠꃷꅍꀋꀞꌠꑊꋌꉬꅊꇈ。